توكل علی الله .......بقلم دانية شهاب

 شنو معنى جمله (متوكّل على الله) ؟!

يمكن الكُل راح " يعتقدون " انو همه يعرفون معناها حق المعرفه ! وميحتاج انو يصفنون بمعناها ولو كم دقيقه !

بس ترى مو كلشي " نعتقده " حيكون صحيح ، لانو لو الكل يعرف معنى هالجمله جان ما شفنا واحد ضايج بسبب شي صارله ، ولا شفنه واحد يلوم (الحظ المصخم -مثل ميگولون- ) ، وچان الكل حبّوا الحال اللي همه بي ... وچان صارتلنه هوااااي اشياء حلوه !

*(متوكّل على الله ) هالجمله بحد ذاتها عباده ، عباده من نوع خااص كلشش ! من اگول هالجمله يعني حياتي كلها شلتها وانطيتها لرب العالمين ، وگتله : تفضّل ربي ؛ سويلي كلشي يفيدني ، وابعد عني كُلشي يضرني ، ربي حياتي بيدك انت مشّيها .. !

... معناها كلش جبير ، والشخص اليگولها لازم يكون گدها وبعد ميخاف من شي بحياته ابد ، ولا يقلق لشي ، ولا يگول ليش فلان شي صارلي ! حته لو جان شي سلبي - بنظره - اكيد بداخله خير جبير رب العالمين انطاهيا بصوره فسرها هو انو هي سلبيه ، 

فـ خلص الحمد لله بيها صالح واقتنع بيها وكأنه هذا الشي الانت رايده ، واملي نفسك ثقه بانو كلشي يصيرلك هو الشي الانسب "الأنسسب " ...

*جربت هالشي بأول خطوه مصيريه بحياتي 👈 السادس ' العلمي '

مثل ما تدرون اللي يريد يطلّع مجموعه طبيه لازم يقرأ الكتب من الغلاف للغلاف ، ومتنعاف ولا كلمه ولا سؤال ولا فتفوته 😐 وآني چانت عيني عالصيدله ، يعني لازم معدل عالي ! بس بنفس الوقت صارلتلي ظروف معينه خلّتني ما اگدر انطي المواد حقها ، وتعبت نفسيتي كلش ، بس الشي الساعدني هو ؛ جنت كل يوم احچي ويه رب العالمين عن حلمي ، وعن طموحي عن المعدل الاتمناه ، وعن اهلي .. ووره كل دعوه اگول متوكله عليك ربي ! اگولها من كل گلب ولسان !

وجتي الامتحانات النهائيه وآني مسلمه امري لله ، وچنت اروح قاريه 3 فصول من اصل 10 - مثلاً - والباقي قرايه شلّالي مثل منگول ؛ بس شنو ؟ چنت اروح مليااااانه تفاؤل ، وابتسامتي متفارگني وبداخلي اگول معليه بالماده المقاريتهه ، اني ربي ويايه ومااخاف .. راح اجاوب ، وبالفعل ..

گضت الامتحانات على هالحال ، الاسئله تجي من المكان اللي قاريته ، وكلشي مااعرفه بي مجال ترك او ميجي اصلاً ، وهكذا خلصت امتحاناتي واني هووواااي اشياء بكتب السادس مااعرفها ، وما فاهمتها ، بس رغم هذا كله الثقه برب العالمين جانت بداخلي اكبر من كلشي .. ونهايته هالثقه شنو ؟

 معدل 96 ! ❤ "الحمد لله"

اغلب اللي عرفوا معدلي عبالهم جنت اطرد عيون او اخاف من الحسد ، بس ليش هيج عبالهم ؟ -لان معارفين شنو معنى واحد متوكل على الله بگلبه قبل لسانه ! وممجربين اللطف الإلهي اللي يجي بعد هالجمله ..

*وبعد ما چان حلمي صيدله ، طلعلي هندسه

عبالكم ضايجه او متحسره عالصيدله ؟

لا والله ابد ☺ مقتنعه 100% انو الصيدله مو مكاني ، وانو بالهندسه منتظرتني آفاق اوسع ، وافراح اكثر ، 

ورب العالمين اختارلي المكان اللي يناسبني ، لانه - سبحانه - يعرفني اكثر مما اعرف نفسي ..

وهذا مثال بسيط اخذته درس الي ، وراح اخلّي منهاج لأيامي الجايه كلها واستفيد منه بخطوات حياتي الاكبر من السادس ..

*اتوكلوا على الله بمعنى الكلمه !!

ومن تتوكلون على الله خلص ، لتفكرون بشي وراها ، واذا صارلكم شي يقهركم گولوا ممكن تكون هالـقهره هي ثمن لسعاده جبيره منعرفها احنه ، بس ربنا الوكيل هو يعرفها ..

خل نتوكل على الله و "نمضي دون إلتفات " 🌸

.

.

، وان شاء الله يعجبكم :) ....

  دانيه شهاب

شارك هذا المقال